Maqedoni- shqiptarët, protestë masive në Shkup

Maqedonasit anulojnë protestën e tyre. Tubim edhe në Tiranë para ambasadës së Maqedonisë-

Ka më shumë se 20 minuta që ka nisur protesta e paralajmëruar e shqiptarëve të Maqedonisë, në kryeqytetin e vendit, Shkup. Siç njofton gazetari ynë ka një mobilizim të përgjithshëm të qytetarëve që kanë nisur grumbullimin nga lagja Çairçankë e Shkupit. Deri më tani mijëra qytetar bëhen gati t’i bashkëngjiten protestës. Protestuesit janë nisur nga qendra tregtare Çairçanja dhe për momentin lëvizin në drejtim të tregut të Bit Pazarit.

Protestuesit shqiptare janë nisur nga xhamia “Jahja Pasha” drejt Gjykatës duke mbajtur në duar pankartat : “Stop rasteve të montuara politike”, “ Radishani”, “ Sopoti” , “Monstra”. Protesta është shoqëruar me thirrjet “UÇK” e “Duam liri”.

Ministria e Brendshme ka shtuar masat e sigurisë në kryeqytet, për të shmangur kontaktin e mundshëm të turmave protestuese. Protesta që pritet të jetë masive e shqiptarëve me moton ‘stop diskriminimit dhe drejtësisë selektive’ do të nis nga pjesa e komunës së Çairit, duke vazhduar me marsh protestues.

Protestat janë paralajmëruar prej ditësh, ndërsa organizatorët nuk kanë ngurruar të bëjnë një thirrje nëpër rrjetet sociale, ku kanë treguar edhe itinerarin e protestave.

Kundër-protestat e paralajmëruar nga qytetarët maqedonas para Qeverisë së Maqedonisë sic duket nuk do të mbahet.

Para Qeverisë ndodhen vetëm pjesëtarët e policisë dhe gazetarë.

Ndërkaq, përfaqësuesit e bashkësisë ndërkombëtare kanë ripërsëritur qëndrimin për përmbajtje nga dhuna gjatë protestave. Ambasada e Shteteve të Bashkuara në Shkup në një deklaratë dhënë Radios Evropa e Lirë, ka thënë se “dhuna minon legjitimitetin e qëllimeve dhe zvogëlon vëmendjen nga përpjekjet produktive për zgjidhjen e çështjeve”. “E përsëritim apelin tonë për shprehje paqësore të qëndrimeve dhe përmbajtje nga dhuna. Askush nuk ka të drejtë të minojë legjitimitetin e qëllimeve dhe të zvogëlon vëmendjen nga përpjekjet produktive për zgjidhjen e çështjeve”, thuhet në përgjigjen e Ambasadës amerikane në Shkup lidhur me protestat dhe kundër-protestat në Shkup.

Tiranë, protestë para ambasadës së Maqedonisë

Në Shqipëri Aleanca Kuqezi zhvilloi një protestë në mbështetje të shqiptarëve në Maqedoni para ambasadës së Maqedonisë në Tiranë. Kreu i AK-së Kreshnik Spahiu bëri apel që të gjitha partitë politike të bashkohen për pakt kombëtar. Ai u shpreh se shqiptarët jetojnë nën pushtimin maqedonas.