Mazhoranca dhe opozita bëhen bashkë në Kuvend-Miratojnë me 114 vota pro projektrezolutën mbi procesin e integrimit

Mazhoranca dhe opozita kanë bashkuar votat sot në Kuvend duke miratuar projektrezolutën mbi procesin e integrimit evropian të Shqipërisë.

Rezoluta u miratua me 114 vota pro dhe 1 abstenim. Deputeti që abstenoi ishte Bujar Leskaj nga Partia Demokratike.

Miratimi i rezolutës shënon një moment të rëndësishëm konsensusi politik në një periudhë kur përplasjet mes Partisë Socialiste dhe Partisë Demokratike janë të theksuara.

Dokumenti parashikon bashkëpunim gjithëpërfshirës dhe angazhimin e përbashkët të institucioneve dhe forcave politike për të avancuar procesin e anëtarësimit të vendit në Bashkimin Evropian.

Rezoluta thekson nevojën për një dialog politik e shoqëror me synim krijimin e një konsensusi kombëtar rreth prioritetetve europiane.

Përveç miratimit të rezolutës Kuvendi ka miratuar edhe projektvendimin për zgjedhjen e Komisioneres për Mbrojtjen nga Diskriminimi, Genta Tafa.

“Para se të fillojmë me rendin e ditës, siç jeni në dijeni, në seancën e datës 7 maj 2026 u miratua projektvendimi për zgjedhjen e Komisioneres për Mbrojtjen nga Diskriminimi. Me shumicë votash nga të gjithë anëtarët e Kuvendit u zgjodh zonja Genta Tafa. Në bazë të nenit 23, pika 3 e ligjit nr. 10221, datë 4.2.2010 “Për mbrojtjen nga diskriminimi” (i ndryshuar), para marrjes së detyrës, Komisioneri bën betimin para Kuvendit. E ftoj zonjën Genta Tafa të futet në sallë”, tha Peleshi.

Ndërkaq, opozita e ka kundërshtuar zgjedhjen e saj, përmes kreut të grupit parlamentar të Partisë Demokratike, Gazment Bardhi: “Një njeri që ka diskriminuar veriun nuk mund të jetë komisionere për Diskrimimin…”

Megjithatë, Tafa ka lexuar formulën e betimit sipas rekomandimit të kryetarit të Kuvendit Niko Peleshi: “Betohem se gjatë kryerjes së detyrave të mia do të mbroj kurdoherë parimin e barazisë në përputhje me Kushtetutën dhe me ligjet e Republikës së Shqipërisë.”