Mbahet mbledhja e KSK-së, Kosova e përkushtuar kundër terrorizmit
E drejtuar nga kryeministri i Republikës së Kosovës, Isa Mustafa, u mbajt të hënën mbledhja e radhës e Këshillit të Sigurisë së Kosovës, ndërsa në këtë takim u shpreh vendosmëria e Kosovës për të qenë pjesë aktive e angazhimeve të botës demokratike, të udhëhequra nga Shtetet e Bashkuara të Amerikës, në luftën kundër terrorizmit.
Gjatë takimit, u shqyrtua Draft-Strategjia Nacionale për Parandalimin e Ekstremizmit të Dhunshëm dhe Radikalizmit që shpie në Terrorizëm.
Kryeministri Isa Mustafa shprehu përkushtimin e Qeverisë së Republikës së Kosovës për të ndërmarrë të gjitha hapat e nevojshëm për të parandaluar dhe luftuar të gjitha format e ekstremizmit të dhunshëm dhe radikalizmit.
Mustafa vlerësoi faktin se draft-strategjia që po hartohet është mjaft gjithëpërfshirëse dhe se ajo përbën një nga instrumentet përmes të cilës do të adresohen angazhimet e Kosovës në këtë drejtim.
Duke theksuar se ekstremizmi i dhunshëm përbën sfidë për të gjitha vendet e botës demokratike, kryeministri Mustafa shprehu vendosmërinë e Kosovës për të qenë pjesë aktive e angazhimeve të botës demokratike, të udhëhequra nga Shtetet e Bashkuara të Amerikës, në luftën kundër këtyre dukurive.
Draft-Strategjia Nacionale për Parandalimin e Ekstremizmit të Dhunshëm dhe Radikalizmit që shpie në Terrorizëm mori përkrahjen e të gjithë anëtarëve të Këshillit të Sigurisë së Kosovës dhe ajo pritet të aprovohet në një prej takimeve të radhës të Qeverisë së Kosovës.
