Mbyllen një mijë shkolla private në Turqi

Presidenti turk, Rexhep Tayyip Erdogan ka urdhëruar mbylljen e më shumë se një mijë shkollave private dhe zgjatjen e periudhës në të cilën disa të dyshuar mund të ndalohen pa urdhër, në dekretin e parë të tij që nga shpallja e gjendjes së jashtëzakonshme për tre muaj.

Erdogan ka shpallur gjendjen e jashtëzakonshme të mërkurën vonë duke thënë se kjo do t’u mundësonte autoriteteve që shpejt dhe në mënyrë efektive të zbulojnë mbështetësit e grushtit të shtetit të dështuar gjatë fundjavës së kaluar, në të cilën të paktën 246 persona u vranë.

Gjendja e jashtëzakonshme lejon presidentin dhe Qeverinë që të kalojë ligje pa pasur mbështetje parlamentare si dhe të frenojnë apo pezullojë të drejtat dhe liritë, të cilat ata i konsiderojnë të nevojshme.

Autoritet turke kanë filluar një seri spastrimesh të ushtarëve dhe gjyqtarëve, të cilët dyshohen se janë të përfshirë në përpjekjet për grusht-shtet.

Presidenti turk ka akuzuar vazhdimisht klerikun Fethullah Gulen se qëndron pas grusht-shtetit, por ky i fundit i ka hedhur poshtë akuzat.