Më shumë hapësira publike në plazhin e Velipojës dhe çmime ‘tavan’ për sezonin turistik

Plazhi i Velipojës pritet të ketë ndryshime pozitive gjatë këtij sezoni turistik, me rritje të hapësirave publike dhe rregullim të strukturës së shërbimeve. Mbi 30% e vijës bregdetare do të jetë plazh publik pa pagesë, ndërsa do të funksionojnë edhe zona të menaxhuara nga bashkia me çmime të reduktuara.

“Për këtë sezon Bashkia e Shkodrës do të ketë 4 plazhe të menaxhuara me pagesë, 3 në Velipojë dhe 1 në zonën e Riollit. Çmimi nuk do të kalojë 500 lekë për çadrat dhe shezlongët në këto plazhe, pa cenuar plazhet falas”, tha Bekim Mema – Drejtor për Zhvillimin Ekonomik në Bashkinë Shkodër.

Sipas Bashkisë, këto plazhe ekonomike do të jenë një alternativë mes hapësirave publike dhe atyre private, duke synuar ofrimin e shërbimeve me kosto të përballueshme për pushuesit.

“Bashkitë kanë të drejtën të përcaktojnë çmime tavan për operatorët privatë. Në Shkodër kemi hapur dëgjesën publike dhe propozimi është 900 lekë për çadër, si çmim maksimal në plazhet private”, shtoi Mema.

Në plazhet private, sipas Bashkisë, do të vendoset një tavan çmimi për të shmangur abuzimet dhe rritjen e pakontrolluar të kostove gjatë sezonit turistik. Ndërkohë, në zonat bregdetare po shtohen edhe infrastrukturat mbështetëse si pedana aksesi, tualete publike dhe sinjalistikë orientuese për pushuesit.

Sipas të dhënave nga Komiteti i Menaxhimit të Turizmit, në Velipojë janë dhënë 42 leje për shfrytëzimin e plazhit, ndërsa procesi i rregullimit vijon. Operatorët turistikë janë në përgatitjet e fundit për sezonin, ndërsa mungesa e fuqisë punëtore mbetet një nga sfidat kryesore edhe këtë vit.