Mesazhe kërcënuese me bombë për institucionet në Shqipëri, autori paraqitet si udhëheqës i “Milicisë Serbe”

Disa institucione në Shqipëri kanë marrë në mëngjesin e së premtes mesazhe kërcënuese në adresat e tyre elektronike, ku pretendohet se në ambientet e tyre janë vendosur lëndë shpërthyese, siç njofton KosovaPress.

Policia e Shqipërisë bëri të ditur se deri më tani nuk është konstatuar asnjë rast i vendosjes së eksplozivëve.

Në emailin kërcënues, autori, i cili prezantohet si “udhëheqës i Milicisë Serbe”, pretendoi se kishte vendosur personalisht një mjet shpërthyes në një ndërtesë dhe paralajmëroi se ai do të shpërthente pas një ore. “Kemi ardhur të hakmerremi ndaj jush. Do të vrasim shqiptarë derisa ta njihni Kosovën si territor të Serbisë”, thuhet në mesazhin që është publikuar online.

Policia njoftoi se në bashkëpunim me Prokurorinë po punon për identifikimin e burimit nga i cili është dërguar emaili.

Raste të ngjashme janë regjistruar edhe më herët në Shqipëri. Në fund të gushtit, disa institucione në qytete të ndryshme morën një email nga një adresë e paidentifikuar me përmbajtje kërcënuese për vendosjen e bombave, por kontrollet e kryera nuk konstatuan praninë e eksplozivëve. Ndërkohë, në mars të këtij viti, Kuvendi i Shqipërisë u bë objekt i një sulmi kibernetik, për të cilin përgjegjësinë e mori grupi i hakerëve Homeland Justice.