Meta-Bersin: SHBA të intensifikojë asistencën për zbatimin e reformës në drejtësi

Pas miratimit të reformës në drejtësi, SHBA të intensifikojë asistencën e saj për zbatimin e suksesshëm, është shprehur kreu i Kuvendit Ilir Meta gjatë takimit me ndihmës sekretarin e Departamentit të Sigurisë Kombëtare të SHBA-së, Alan Bersin.

Z. Meta u shpreh dhe për rritjen e bashkëpunimit mes dy vendeve për një kontroll më rigoroz të kufijve.

“Duke marrë në konsideratë edhe efektet e krizës së fundit migratore në Evropë si dhe eksperiencën e gjerë amerikane në fushën e sigurisë, Shqipëria dhe SHBA duhet ta rrisin bashkëpunimin e tyre për një kontroll më rigoroz të kufijve dhe në funksion të përforcimit të infrastrukturës strategjike në porte e aeroporte”, tha Meta.

Edhe z. Bersin u shpreh për një bashkëpunim të Departamentit të Sigurisë me institucionet kombëtare të Sigurisë në Shqipëri. Të dy bashkëbiseduesit folën për sigurinë kufitare, atë detare, ajrore si dhe përfitimin e të dy vendeve.

Gjatë qëndrimit të tij në SHBA, z. Meta zhvilloi takime edhe në Departamentin e Shtetit me Zv. Ndihmës Sekretarin e Shtetit për Çështjet e Evropës dhe Euroazisë, z. Hoyt Brian Yee si dhe me zyrtarë të lartë në Këshillin e Sigurisë Kombëtare.