Meta-Engel: Miqësia shqiptaro-amerikane, bazë solide për partneritetin mes dy vendeve

Kryetari i Kuvendit, Ilir Meta, gjatë një takimi të premten me Kongresmenin amerikan, Eliot Engel, e falënderoi për mbështetjen e tij të jashtëzakonshme në vite dhe të Kongresit Amerikan ndaj Shqipërisë dhe popullit shqiptar, duke vënë në dukje edhe rolin e tij të veçantë në mbështetje të njohjeve ndërkombëtare të shtetit të Kosovës.
Duke biseduar mbi zhvillimet e fundit politike në vend, Kongresmeni Engel vlerësoi progresin e bërë nga Shqipëria dhe në veçanti miratimin e paketës kushtetuese për reformën në drejtësi. Në këtë kontekst, ai vlerësoi rolin e rëndësishëm të kryetarit të Kuvendit në miratimin me konsensus të paketës kushtetuese gjatë muajit korrik.
Meta shprehu mirënjohjen për mbështetjen e fortë të SHBA në forcimin e institucioneve demokratike të Shqipërisë dhe në veçanti për reformën në drejtësi, e cila është kyçe jo vetëm për avancimin e vendit drejt BE-së, por edhe për luftën ndaj korrupsionit, krimit të organizuar, dhe për rritjen e besueshmërisë së investitorëve të huaj si dhe për përmirësimin e klimës së biznesit në Shqipëri.Më tej dy zyrtarët biseduan dhe mbi zhvillimet e fundit në rajon, duke evidentuar rolin konstruktiv të Shqipërisë, dhe në përfundim të takimit ndanë bindjen e përbashkët se miqësia e fortë dhe e natyrshme shqiptaro-amerikane është një bazë solide për zhvillimin dhe konkretizimin e partneritetit strategjik mes dy vendeve në të ardhmen