Meta: Marrëdhëniet Shqipëri-Kinë vijnë duke u forcuar
Kryetari i Lëvizjes Socialiste për Integrim Ilir Meta priti sot një delegacion të nivelit të lartë të Partisë Komuniste të Kinës kryesuar prej Zhao Hongzhu, Sekretar i Sekretariatit të Komitetit Qendror të PKK dhe Zv. Sekretar i Komitetit Qendror për Inspektim Disiplinor të PKK, i cili shoqërohej prej Ambasadores së Republikës Popullore të Kinës në Shqipëri znj. Jiang Yu.
Meta i uroi mirëseardhjen në Tiranë Zhao Hongzhu dhe delegacionit të nderuar të Partisë Komuniste të Kinës duke vënë në dukje se marrëdhëniet ndërparlamentare dhe ato ndërpartiake mes Shqipërisë dhe Kinës, vijnë duke u forcuar, në shërbim të cilësisë së bashkëpunimit dypalësh.
Sakaq, ai theksoi se vizita e Zhao Hongzhu në Shqipëri është tregues i vëmendjes që Partia Komuniste dhe autoritetet e Kinës i kushtojnë Shqipërisë, dhe veçanërisht zgjerimit të marrëdhënieve dypalëshe.
Në këtë kuadër, Meta shprehu vullnetin për thellimin e mëtejshëm të bashkëpunimit mes Lëvizjes Socialiste për Integrim dhe Partisë Komuniste të Kinës përmes shkëmbimit të eksperiencave reciproke në interes të zgjerimit të gjithanshëm të marrëdhënieve midis dy vendeve e popujve tanë.
Sekretari i Parë i Sekretariatit të Komitetit Qendror të PKK dhe Zv. Sekretari i Komitetit Qendror për Inspektim Disiplinor të PKK, Zhao Hongzhu, shprehu kënaqësinë e vizitës së tij në Shqipëri dhe nënvizoi se Partia Komuniste e Kinës i sheh marrëdhëniet mes dy vendeve tona me prioritet të lartë, gjë që reflektohet edhe në shkëmbimet e nivelit të lartë mes dy vendeve. Në këtë drejtim, PKK është e gatshme të thellojë më tej marrëdhëniet ndërpartiake me LSI-në.
