Meta: Opozita ta thotë fjalën e saj në parlament

Kryetari i Kuvendit, Ilir Meta apeloi sërish sot në adresë të opozitës për rikthimin e saj në parlament. “Ne dëshirojmë më të mirën për opozitën, që të thotë fjalën e saj në parlament, sepse vend si parlamenti nuk mund të ketë.

I bëjmë thirrje opozitës që të rikthehet në Kuvend” u shpreh kryeparlamentari për mediat, pas takimit me homologun çek, Jan Hamacek, i cili po viziton sot Tiranën.
I pyetur për takimin e ditës së enjte me Presidentin e Republikës, Bujar Nishani, lidhur me çështjen e zgjedhjes së Guvernatorit të Bankës Qendrore, Meta u përgjigj se ky takim është thirrur nga Kreu i Shtetit.
“Presidenti ka të drejtën e tij të përmbushë të gjitha detyrimet kushtetuese dhe shpresoj që këtë gjë ta bëjë në mënyrën më konstruktive dhe të përgjegjshme. Takimi nuk është kërkuar nga unë, por nga Presidenti dhe kam dëshirën e mirë për një takim dhe një shkëmbim mendimesh konstruktive”, u shpreh kryetari i Kuvendit