Meta reagon për ministrat: E vetmja ndërhyrje e imja, për t’u bërë Blushi ministër

Pas akuzave të Ben Blushit se kryeministri Edi Rama e hoqi ministrin Saimir Tahiri si kërkesë të Ilir Metës, ka reaguar edhe kreu i Kuvendit.

Meta ka zbuluar se e vetmja kërkesë që ka bërë tek Rama ka qenë lobimi për të bërë Blushin ministër. “Por ndoshta mirë është bërë që nuk është bërë Ministër sepse Shqipëria ka një alternativë të re”, tha Meta.

Reagimi i plotë i Metës

Faleminderit për këtë fjalim historik.

Dhe meqenëse në këtë fjalim historik unë u përmenda më shumë se nga politikanët e vjetër, nga një politika i ri i sapo ardhur nga një planet tjetër, dua t’i them të gjithë ministrave, kandidatëve për ministra, sot nesër e për gjithmonë, që e vetmja ndërhyrje që kam tentuar të bëj pranë z. Rama kur është bërë qeveria, është që parafolësi të bëhej ministër.

Por ndoshta mirë është bërë që nuk është bërë Ministër sepse Shqipëria ka një alternativë të re, një shpresë të madhe, një njeri të pa provuar asnjëherë.

Ka të drejtë të kërkojë të votohet dhe të besohet.