Meta: Të zvogëlohet numri i deputetëve në Kuvendin e Shqipërisë

Kryeparlamenatri Meta gjatë fjalës së tij, është ndalur tek zvogëlimi i numrit të deputetëve, listat e hapura dhe minimizimi i numrit të biznesmenëve deputetë në Parlament.

Është zhvilluar sot në Tiranë tryeza e diskutimit me temë “Forcimi i pavarësisë së organeve të menaxhimit zgjedhor-Shkëmbimi i përvojave mes Shqipërisë dhe Sllovenisë”, organizuar nën kujdesin e Komisionit Qendror të Zgjedhjeve të Republikës së Shqipërisë (KQZ).

Në këtë aktivitet mbajti një fjalë përshëndetëse edhe kryetari i Kuvendit të Shqipërisë, Ilir Meta, ambasadorja e Republikës së Sllovenisë në Tiranë, Lea Stancic, si dhe kryetarja e KQZ-së, Lefterije Luzi.

Kryeparlamenatri Meta gjatë fjalës së tij, është ndalur tek zvogëlimi i numrit të deputetëve, listat e hapura dhe minimizimi i numrit të biznesmenëve deputetë në Parlament.

“Mendoj se duhet shikuar se numri i deputetëve ndoshta është më i madh seç duhet. Edhe me reformën administrative zvogëluam numrin e njësive administrative dhe menduam se ishte një hap i domosdoshëm. Duhet shikuar diçka edhe tek Parlamenti sepse kjo duhet të ndihmojë në një funksionim të mirë të Kuvendit, edhe një cilësi të mirë të funksionimit të komisioneve”, ka deklaruar Meta.

Ndërsa kryetarja e KQZ-së, Lefterije Luzi, u shpreh se ngritja e qendrës së trajnimit zgjedhor, certifikimi i njohurive zgjedhore të individëve që angazhohen në procesin zgjedhor, është domosdoshmëri.

Temat ku u fokusua kjo tryezë diskutimi kishin të bënin me përshkrimin e përgjithshëm në lidhje me procesin e reformës zgjedhore, reforma zgjedhore dhe pavarësia e trupave te menaxhimit zgjedhor dhe si mund te arrihet kjo, depolitizimi i administratës zgjedhore, trajnimi profesional i të gjithë aktorëve dhe faktorëve që marrin pjesë në procesin zgjedhor, etj.