Meta, vizitë private në Kosovë, Aleanca e Grave deputete në Preshevë

Kryetari i Kuvendit të Republikës së Shqipërisë, Ilir Meta, është duke qëndruar këtë të diel në Kosovë për një vizitë private, konkretisht në Gllogjan, në familjen e kryetarit të Aleancës për Ardhmërinë e Kosovës, Ramush Haradinaj. Mësohet se kryeparlamentari Ilir Meta ka diskutuar me kryetarin e AAK-së, Ramush Haradinaj, edhe lidhur me situatën aktuale politike në Kosovë. Kryeparlamentari Meta, i shoqëruar nga ambasadori i Shqipërisë në Kosovë, Qemal Minxhozi, ka vizituar varrezat e dëshmorëve dhe ka vendosur lule pranë varreve të vëllezërve Haradinaj, të rënë në luftën çlirimtare të Kosovës. Ndërkohë që në një vizitë zyrtare ka qenë dhe Aleanca e Grave deputete në Parlamentin e Shqipërisë, të cilat kanë vizituar Luginën e Preshevës. Ato thanë se, në dallim prej meshkujve në politikë, janë më të bashkuara për të dëgjuar problemet e të gjithë shqiptarëve.  Kryetarja e Aleancës së grave deputete, Mesilda Doda, tha se  shqiptarët nuk kërkojnë rikthimin e historisë, por vetëm të drejtat e garantuara ndërkombëtare. Ndërkohë që njëzëri deputetët e Kuvendit të Shqipërisë nga të gjitha grupet parlamentare premtuan se do të kujdesen për Preshevën në sferën politike, si detyrim kushtetues.