Ministrat teknikë të PD-së dorëzojnë kompetencat

Edhe pse nuk kanë dhënë ende dorëheqjet, ministrat teknikë të Partisë Demokratike kanë filluar të dorëzojnë kompetencat e tyre.

Ministrja e Financave, Helga Vukaj ka firmosur 13 urdhra ku i delegon 13 kompetenca të ndryshme zëvendësministrit Erjon Luci, përfaqësues i Partisë Socialiste.

Delegimi i kompetencave nuk ka afat përfundimi, pasi në të gjitha urdhrat thuhet se vlefshmëria e zëvendësimit të ministres nga numri dy i  institucionit do të bëhet për një kohë të papërcaktuar, deri në shfuqizimin e këtij urdhri.

Sipas urdhrave të kreut të financave, zëvendësministri Luci autorizohet të jetë titullar i ministrisë për të kryer pagesat e pagave dhe pensioneve, për shpërndarjen e rentës minerare, për rialokimin e fondeve për institucionet, për nënshkimin e marrëveshjeve dy paleshe, kompensimin e pronarëve, si dhe kalimin e fondeve për disa bashki të cilat kanë në përpunim e sipër disa projekte infrastrukturore.

Por Helga Vukaj nuk është e vetmja që lëshon kompetencat e saj.

Edhe ministrja teknike e  Mirëqënies Sociale, Xhulieta Kërtusha ka firmosur një urdhër ku autorizon një person të jetë firmëtari i institucionit për të gjitha tenderët e kësaj ministrie.

Ajo që bie në sy, është se delegimi i kompetencave është për deri në 31 dhjetor të këtij viti.

Edhe pse parashikohet që pas një muaji të  mos jetë më ministre dhe qeveria e re të sjellë një tjetër njeri në krye të ministrisë së çështjeve sociale, Kërtusha i ka dhënë vetes të drejtën e firmoje së një urdhri me fuqi deri në ditën e fundit të këtij viti.

Personi i autorizuar nga teknikja Kërtusha është Elird Qëndro, me detyrë Drejtor i Përgjithshëm i Shërbimeve Mbështetëse.

Ministrat teknikë të PD-së ende nuk kanë dhënë dorëheqjen, edhe pse Rama jua ka kërkuar publikisht, ndërsa Basha është shprehur se teknikët i kanë gati dorëheqjet, dhe, sapo të përgatisin raportet për zgjedhjet, ata do të largohen.