Mjekja: Kur mund të merret në konsideratë kirurgjia bariatrike për trajtimin e obezitetit

Dr. Megi Lekbello, mjeke endokrinologe, ka folur për rastet kur kirurgjia bariatrike mund të merret në konsideratë si një alternativë për trajtimin e obezitetit, në ciklin e podcasteve “Obeziteti, le të flasim për të”.

Sipas saj, kirurgjia bariatrike mund të shqyrtohet në rastet kur ndryshimi i stilit të jetesës dhe trajtimi medikamentoz nuk kanë dhënë rezultatet e pritshme.

“Nëse dështon stili i jetesës, nëse dështon edhe përdorimi i medikamenteve që shërbejnë për obezitetin, atëherë mund të mendohet për kirurgjinë bariatrike”, u shpreh Lekbello.

Mjekja shpjegoi se kirurgjia bariatrike është një ndërhyrje invazive dhe përfshin disa teknika. Ndër format kryesore ajo përmendi procedurat restriktive, si gastrektomia “sleeve”, e cila redukton madhësinë e stomakut dhe ndihmon në krijimin e ndjesisë së ngopjes me sasi më të vogla ushqimi.

Një tjetër kategori është ajo malabsorbtive, ku përveç ndërhyrjes në stomak modifikohet edhe një pjesë e zorrës, duke ndikuar në përthithjen e ushqyesve.

Sipas Dr. Lekbellos, këto ndërhyrje përdoren kryesisht te pacientët me obezitet të gradës së tretë, me BMI mbi 40, ose te personat me BMI mbi 35 që kanë edhe sëmundje shoqëruese të lidhura me obezitetin.

Mjekja thekson se vendimi për kirurgjinë bariatrike duhet të merret pas vlerësimit të plotë të gjendjes së pacientit dhe si pjesë e një qasjeje të personalizuar për trajtimin e obezitetit.