Moskë-Kiev, pakt për vazhdimin e armëpushimit

Moska dhe Kievi kanë rënë dakord që të urdhërojnë tërheqjen e më shumë armatimeve në lindje të Ukrainës, pasi luftimet e fundit kanë ngjallur frikën e shkeljes së armëpushimit.

Marrëveshja u arrit pas një seance bisedimesh të zhvilluara mes zyrtarëve në Berlin, ku merrnin pjesë edhe ministrat e Jashtëm të Francës dhe Gjermanisë.

Sipas raportimeve të mediave evropiane, marrëveshja parashikon tërheqjen e mortajave, tankeve dhe armatimeve të rënda nën 100 milimetra.

Por nga ana tjetër Gjermania paralajmëroi se bisedimet nxorrën edhe njëherë në pah diferencat mbi konfliktin mes ushtarëve ukrainas dhe rebelëve pro-rusë.

“Ishte një bisedim shumë i gjatë dhe shumë intensiv, që në disa pjesë të tij ishte shumë kontrovers. Gjatë procesit qëndrimet e kundërta të Moskës dhe Kievit dolën edhe njëherë në dritë”, deklaroi ministri i Jashtëm gjerman, Frank Walter Steinmeier.

Por ai shtoi se të gjitha palët riafirmuan angazhimin për mbajtjen e armëpushimit për të cilin u ra dakord në shkurt, në negociatat e zhvilluara në Minsk.

Të dyja palët vlerësohet se i janë përmbajtur marrëveshjes, përveç përshkallëzimit të luftimeve në disa pika, si në aeroportin e Donetskut dhe në fshatin Shirokine, në rrethinat e qytetit strategjik të Mariupolit.

Ministrat e Jashtëm të Gjermanisë dhe Francës shprehën shqetësimin e tyre për përshkallëzimin e situatës.

“E rëndësishme është se duke parë përkeqësimin e situatës, ne ramë dakord jo vetëm për vazhdimin e tërheqjes së armatimeve të rënda, por edhe të dy kategorive të tjera armatimesh”, shtoi Steinmeier.