Mourinho ka “Pintus” e tij për përgatitjen fizike te Reali, njihet me nofkat “Doktori” ose “Profesori”

Dalëngadalë po zbulohen më shumë detaje nga marrëveshja që Mourinho ka arritur me Real Madridin. Nëse gjithçka shkon sipas planeve të Florentino Pérez, portugezi do të drejtojë skuadrën për dy sezone, me opsion edhe për një tjetër, që aktivizohet automatikisht nëse fiton La Liga-n.

Mourinho do të sjellë disa nga bashkëpunëtorët e tij më të afërt: Joao Tralhao, Pedro Machado, Ricardo Formosinho dhe analistin Roberto Merella. Ndërkohë mbetet për t’u vendosur nëse do ta shoqërojë edhe përgatitësi atletik Antonio Dias, i konsideruar si “Pintus i Mourinhos”.

Përgatitja fizike ka qenë një problem i madh te Reali në sezonet e fundit. Klubi hoqi dorë nga Xabi Alonso edhe sepse mendonte se kishte mangësi në këtë aspekt, të menaxhuar nga Ismael Camenforte. Edhe pse skuadra iu besua Arbeloa, drejtuesit duan që Antonio Pintus të mbetet figurë kyçe, ashtu si trajneri i portierëve Luis Llopis.

Megjithatë, Mourinho këmbëngul për Antonio Dias. 43-vjeçari konsiderohet një nga njerëzit më të besuar të trajnerit portugez. Te Benfica ai ndërtoi një skuadër shumë të fortë fizikisht dhe njihet me nofkat “Doktori” ose “Profesori” për njohuritë teorike.

Dias u formua te FC Porto, ndërsa mundësinë e parë të madhe ia dha Nuno Espírito Santo në vitin 2012 te Rio Ave. Më pas punoi me të te Valencia, Porto, Wolverhampton, Tottenham, Al Ittihad, West Ham dhe Nottingham Forest, derisa Mourinho e mori te Fenerbahçe.

Vetë Nuno e përshkruante kështu rëndësinë e Dias: “I thashë: Te Valencia duhet të luajmë në këtë mënyrë dhe për këtë na duhen superatletë. Ti ke përgjegjësinë të m’i japësh. Ai e bëri si askush tjetër”. Sipas tij, Dias garanton që lojtarët të përballojnë kërkesat maksimale në çdo stërvitje dhe ndeshje. Ky mbetet detaji i fundit që Mourinho dëshiron të mbyllë para aventurës së re te Reali.