MPB-ja do të përdorë dronë për filmime ajrore në Shkup për festën e 23 Tetorit

Ministria e Punëve të Brendshme e Maqedonisë së Veriut ka njoftuar se gjatë ditës së nesërme, 23 tetor, do të ketë përdorim të shtuar të mjeteve ajrore pa pilot (dronë) për filmime nga ajri në Shkup. Siç njofton MPB-ja, sipas raportimit të Makfax-it, aktivitetet lidhen me shënimin e festës shtetërore 23 Tetori – Dita e Luftës Revolucionare Maqedonase.

Për nevojat e realizimit të solemnitetit, hapësira e parkingut të Muzeut të Artit Bashkëkohor do të sigurohet në periudhën nga ora 10:00 deri në 23:30. MPB-ja u bën apel qytetarëve që t’i largojnë automjetet nga ky parking, në mënyrë që ceremonia të zhvillohet pa pengesa.

Sipas njoftimit të MPB-së, aktivitetet do të realizohen në kuadër të masave të planifikuara për shënimin e festës, ndërsa në lokacione të caktuara do të vërehet prani dhe lëvizje e shtuar e dronëve. Kjo, sipas ministrisë, nuk duhet të shkaktojë shqetësim te qytetarët.

MPB-ja thekson se bëhet fjalë për aktivitete të planifikuara paraprakisht dhe u bën apel qytetarëve për mirëkuptim, me qëllim që ato të zhvillohen pa pengesa dhe në mënyrë të sigurt.