MSH diskuton me UNICEF-in e OBSH-në për forcimin e konceptit të mjekësisë familjare
Ministri i Shëndetësisë Imet Rrahmai priti sot në takim Zëvendësshefin e Zyrës ë UNICEF-it në Kosovë, z. James Mugaju dhe konsulenten ndërsektoriale nga Zyra Regjionale e UNICEF-it, dr. Bettina Schwethelm, të shoqëruar nga zyrtarët vendorë në UNICEF e OBSH, dr. Agron Gashi e dr. Sami Uka.
Në këtë takim përveç vlerësimit që i është bërë konferencës “Përmirësimi i Mirëqenies së Nënës dhe Fëmijëve në Kosovë përmes Shërbimeve të Vizitave Shtëpiake”, mbajtur një ditë më parë në Gjilan, është biseduar për procesin e koordinimit midis partnerëve për forcimin e sistemit shëndetësor në Kosovë nën lidershipin e MSh-së; përforcimin e vizitave shtëpiake dhe vetë konceptit të Mjekësisë Familjare në Kosovë, përkatësisht integrimin e këtyre shërbimeve brenda këtij koncepti; koston e shërbimeve të vizitave shtëpiake dhe rritjen e performancës në Kujdesin Parësor Shëndetësor përmes motivimit të punonjësve shëndetësor.
Ministri Rrahmani ka vlerësuar bashkëpunimin e mirë të MSH-së me Zyrën e UNICEF-it dhe OBSH-së në Kosovë, duke vlerësuar se përmes projekteve të përbashkëta dhe të koordinuara që para së gjithash forcojnë kapacitetin e Kujdesit Parësor Shëndetësor, MSh-ja po synon që të gjithë aktorët në sektorin shëndetësor t’i bëjë pjesë aktive të reformës shëndetësore.
