Mustafa, takim lamtumire me përfaqësuesin special të Sekretarit të Përgjithshëm të OKB-së, Farid Zarif

Kryeministri i Republikës së Kosovës, Isa Mustafa, priti në takim lamtumire përfaqësuesin special të sekretarit të përgjithshëm të Kombeve të Bashkuara, shef i deritashëm i UNMIK-ut në Kosovë, Farid Zarif.

Gjatë takimit, kryeministri Mustafa foli për progresin e gjithanshëm në Republikën e Kosovës si dhe vlerësoi përkrahjen që agjenci dhe trupa të ndryshëm të Kombeve të Bashkuara po japin për Kosovën.

Kryeministri Mustafa e falënderoi Zarif për punën dhe kontributin e tij në Kosovë, duke i uruar suksese në angazhimet e tij të mëtejshme. Përfaqësuesi special i Sekretarit të Përgjithshëm të Kombeve të Bashkuara, shef i deritashëm i UNMIK-ut në Kosovë, Farid Zarif, e falënderoi kryeministrin Mustafa për pritjen, duke vlerësuar progresin në Kosovë si dhe shprehu mirënjohje për institucionet dhe popullin e Kosovës, njoftoi zyra e shtypit e Kryeministrisë kosovare.

Ndërsa sipas medias, Sekretari i Përgjithshëm i OKB-së, Ban Ki-Moon ka emëruar shefin e ri të Misionit të Administratës së Përkohshme të Kombeve të Bashkuara në Kosovë – UNMIK, Zahir Tanin, përkatësisht përfaqësuesin e Afganistanit në Kombet e Bashkuara. Tanin do të marrë këtë pozitë duke filluar nga 31 gushti.