Mustafa takohet me ekspertët ndërkombëtarë për Demarkacionin
Kryeministri i Kosovës, Isa Mustafa, është takuar me ekspertët ndërkombëtarë, të cilët kanë formuar një komision “ad hoc” për të vlerësuar procesin e Demarkacionit me Malin e Zi.
“Gjatë takimit, kryeministri Mustafa ka theksuar gatishmërinë e plotë të Qeverisë së Kosovës për të dhënë çdo lloj kontributi që mund t’i kërkohet nga ky komision”, thuhet në njoftimin e lëshuar nga këshilltari i Mustafës, Bajram Gecaj në llogarinë e tij në Facebook.
“Po ashtu, kryeministri Mustafa ka shprehur bindjen se ky komision vlerësues, i përbërë nga tre ekspertë nga SHBA-të, Gjermania dhe Britania e Madhe, do të kryejnë me profesionalizëm këtë proces”.
Ky komision është themeluar me vendim të Presidentes, Atifete Jahjaga, pas pakënaqësive të Opozitës së Bashkuar me procesin e Demarkacionit.
