Ndërmarrjet shtetërore këtë vit paguan divident 6 herë më pak se më 2015
Ndërmarrjet në të cilat shteti është aksioner paguan këtë vit 6 herë më pak divident se më 2015. Sipas të dhënave nga Ministria e Financave gjatë periudhës janar –nëntor 2016 u arkëtuan 84 milionë lekë, teksa një vit më parë të ardhurat nga divindenti i ndërmarrjeve me pronësi shtetërore ishin 523 milionë lekë.
Këtë vit pagatorët më të mëdhenj të dividentit ishin Enti Rregullator i Furnizimit me Ujë me 46 milionë lekë dhe Qendra Tregtare për Zhvillim 7 milionë lekë.
Fabrika e pijeve freskuese Coca –Cola , të cilën shteti është aksioner i minorancës derdhi divident 6 milionë lekë, Qendra e Regjistrimit të Aksioneve pagoi në buxhet 5 milionë euro, portet e Durrësit, Sarandës dhe Vlorës paguan gjithsej 8 milionë lekë.
Vitin e kaluar shumën më të madhe të dividentit e pagoi Zyra Qendrorë e Regjistrimit te Pasurisë Tirane me një vlerë 444 milionë lekë dhe Aparati i Ministrisë se Zhvillimit Ekonomik, Turizmit dhe Sipërmarrjes pagoi 60 milionë lekë.
Gjithashtu Shtypshkronja e Letrave me Vlere pagoi 18 milionë lekë. Asnjë nga këto ende nuk ka paguar këtë vit divident.
Tatimi mbi dividentin u rrit në 15 për qind në fillim të vitit 2016 nga 10 për qind që ishte më parë.
Në terma ekonomike, dividendi është norma e fitimit të kapitalit aksioner të investuar në një shoqëri. Në kuptimin ligjor të një shoqërie termi përgjithësisht përdoret për të treguar shpërndarjen formale tek aksionerët te të ardhurave të mbajtura (zakonisht me vendim të aksionerëve).
