Nënshkruhet marrëveshja tripalëshe për livrimin e gazit rus në Ukrainë
Një marrëveshje që mundëson garantimin e livrimit të gazit rus në Ukrainë deri në muajin mars të vitit 2015 u nënshkrua dje në mbrëmje në Bruksel nga Rusia, Ukraina dhe Bashkimi Evropian, theksuan gazetarët.
Marrëveshja u nënshkrua nga ministrat e Energjisë së dy vendeve, rusi, Alexander Novak dhe ukrainasi, Juri Prodan dhe nga komisioneri evropian për Energjinë, Gunther Oettinger.
Një shtesë në kontratën mes grupeve të gazit, rus ”Gazprom” dhe ukrainas ”Naftogaz” u nënshkrua menjëherë nga drejtuesit e dy kompanive, Alexei Miller dhe Andriy Kobolev.
“Përgjegjësia politike, logjika e bashkëpunimit dhe mirëkuptimi ekonomik kanë triumfuar”, theksoi presidenti i Komisionit Evropian Hose Manuel Barroso, në një konferencë shtypi.
“Ky është një hap i rëndësishëm për sigurinë tonë energjetike”, nënvizoi ai duke shtuar se nuk kishte asnjë arsye që njerëzit në Evropë të mos ngroheshin këtë dimër.
Barroso theksoi se shpresonte që kjo marrëveshje do të rrisë besimin mes Ukrainës dhe Rusisë.
”Zbatimi i marrëveshjeve të Minskut për një armëpushim në lindjen separatiste në Ukrainë do të ishte prioritet”, shtoi ai.
Oettinger theksoi se marrëveshja arrinte vlerën e 4,6 miliardë eurove duke përfshirë dhe shlyerjen e borxhit të gazit rus nga Ukraina dhe livrimet gazit deri në muajin mars 2015. Çmimi u vendos 385 dollarë për 1 000 metra kub.
Ai theksoi se Ukraina ishte në gjendje të shlyente këtë pagesë.
