Nga Lumi Vjosa te energjia e erës, Shqipëria prezanton në Portugali modelin e ri të zhvillimit të qëndrueshëm

Rajoni i Mesdheut po përballet me sfida klimatike të paprecedenta, por Shqipëria duket se ka gjetur formulën për të qenë një hap përpara. Në takimin e rëndësishëm të Asamblesë Parlamentare të Bashkimit për Mesdheun (PA-UfM), të mbajtur në Magra të Portugalisë, Kuvendi i Shqipërisë prezantoi një bilanc ambicioz të reformave mjedisore dhe energjetike.

Lumi Vjosa, një standard botëror në UNESCO

Kryetarja e Komisionit për Burimet Natyrore, Anila Denaj, gjatë fjalës së saj përpara kolegëve euro-mesdhetarë, ndaloi te ajo që konsiderohet “kupa e artë” e mbrojtjes së natyrës në Shqipëri.

“Një arritje historike për ne është shpallja e lumit Vjosa si Rezervë Biosfere e UNESCO-s në shtator 2025. Ky akt dëshmon vullnetin tonë për të ruajtur ekosistemet unike sipas standardeve më të larta ndërkombëtare,” nënvizoi Denaj.

Shqipëria po ecën me ritme të shpejta edhe në harmonizimin ligjor me direktivat e BE-së (veçanërisht Direktivën 2009/147/EC), duke forcuar mbrojtjen e shpendëve të egër dhe zonave të mbrojtura.

Revolucioni i gjelbër, dielli dhe era si prioritet

Për herë të parë, Shqipëria nuk mbështetet më vetëm te hidrocentralet. Denaj bëri të ditur se diversifikimi energjetik ka hyrë në një fazë të re. Sot, rreth 10% e energjisë në vend prodhohet nga burime alternative, ku spikasin parqet fotovoltaike dhe turbinat me erë. Ky diversifikim e pozicionon Shqipërinë si një nga vendet me ritmin më të shpejtë të dekarbonizimit në mbarë Ballkanin Perëndimor.

Pavarësisht progresit në energji, mbetet ende punë për t’u bërë në menaxhimin e mbetjeve. Kryetarja Denaj pranoi se zgjidhja kërkon më shumë se thjesht infrastructure ku po zbatohet një paketë e re ligjore për menaxhimin e mbetjeve; nevojitet një angazhim më i madh i qytetarëve dhe dialog me shoqërinë civile; po avancohet në qeverisjen për planifikimin e integruar të energjisë.

Duke kombinuar ligjet strikte me teknologjitë e reja të energjisë së gjelbër, Shqipëria po synon të shndërrohet në një model të qëndrueshëm për të gjithë pellgun e Mesdheut.