Nis seanca plenare

Kuvendi nisi të enjten punimet e seancës plenare me diskutimin e disa ndryshimeve në ligjin “Për transformimin e ndërmarrjeve shtetërore në shoqëri tregtare”. Krahas tij, rendi i ditës i parlamentit parashikon dhe shqyrtimin e disa ndryshimeve në ligjin “Për regjistrimin e pasurive të paluajtshme”; të ndryshimeve në ligjin “Për transportet rrugore”, si dhe ratifikimin e dy marrëveshjeve me palën gjermane, ajo ‘për bashkëpunimin kulturor’ dhe me KFW Frankfurt Am Main, për financimin e Programit “Infrastruktura bashkiake’ për furnizimin me ujë dhe kanalizime të disa qyteteve të vendit.

Seanca e sotme gjithashtu pritet të shoqërohet me debate rreth pr/ligjit të qeverisë për ngritjen e Byrosë Kombëtare të Hetimit, për të cilin seanca pritet të vendosë shqyrtimin me procedurë të përshpejtuar.

Pr/ligji, i shumëdebatuar javët e fundit, u miratua të mërkurën nga Këshilli i Ministrave. Në draft, Byroja e Hetimit trajtohet si një strukturë e veçantë pranë Policisë së Shtetit, me objekt luftën kundër korrupsionit dhe krimit, në radhët e zyrtarëve të lartë.