“Nuk jam atraksion turistik”, Rama batuta me turistët e huaj në Gjirokastër
Gjirokastra po tërheq gjithnjë e më shumë vëmendjen e turistëve nga e mbarë bota. Shifrat tregojnë se ajo u vizitua nga më shumë se 200 mijë turistë në 2022.
Kryeministri, njëherësh kryetari i Partisë Socialiste Edi Rama në kuadër të turit të falenderimeve që po zhvillon në qytetet e vendit u ndal të dielën në Gjirokastër, ku takoi një grup turistësh të huaj.
“A jeni ju Rama? Se kam këtë grup të madh me turistë…”, iu drejtua guida kryeministrit Rama.
“Po, por nuk jam atraksion turistik”, iu përgjigj Rama, duke shkaktuar të qeshura mes turistëve.
Më herët, gjatë takimeve me autoritetet lokale në Gjirokastër, ai bëri të ditur se do të vijojnë investimet për përmirësimin e infrastrukturës dhe restaurimi i objekteve të trashëgimisë kulturore
Raporti i INSTAT-it për turizmin tregon se, 7.5 milionë turistë të huaj vizituan vendin tonë gjatë vitit 2022, duke i besuar Shqipërisë pushimet e tyre, jo vetëm gjatë sezonit veror, por edhe përgjatë stinëve të tjera të vitit.
Janë 1.9 milionë më shumë se viti 2021 dhe 18 % më shumë se viti 2019, që deri tani mbante rekordin e shifrave.
Po ashtu, raporti jep të dhëna interesante të tregjeve të reja që po rriten me shpejtësi. 85% më shumë vizitorë nga Anglia; 3.7 herë më shumë vizitorë nga Spanja; 2 herë më shumë vizitorë nga Sllovenia; 3 herë më shumë vizitorë nga Holanda; 84 % më shumë vizitorë nga Turqia; 2 herë më shumë nga vendet nordike; pa harruar edhe mysafirët nga Kosova, Maqedonia e Veriut dhe hyrjet nga vendet e tjera të Ballkanit.
Të dhënat e Bankës së Shqipërisë treguan se, të ardhurat vjetore nga turistët e huaj në vitin 2022 arritën 2.84 miliardë euro, ose 36 % më shumë sesa në vitin 2019.
Ndërkohë, autoritetet në vend janë optimiste për një sezon të mbarë turistik edhe përgjatë këtij viti, teksa kanë deklaruar se deri tani janë rezervuar thuajse krwejtësisht kapacitetet turistike në vend.
