Nuk u pranua në garën e PD, Gjykata e Tiranës rrëzon padinë e Mereme Selës

Padia e paraqitur nga mjekja Mereme Sela lidhur me mosmiratimin e kandidaturës së saj për drejtimin e Partisë Demokratike është rrëzuar nga Gjykata e Tiranës, me arsyetimin se dosja gjyqësore nuk plotësonte kushtet formale dhe “mungonin dokumentet shoqëruese”.

Vendimi mësohet të jetë marrë më 8 maj nga gjyqtarja Suela Xhani, e cila, pas një vlerësimi paraprak të materialeve të depozituara, konstatoi një sërë mangësish në kërkesë-padinë e paraqitur.

Sipas dokumentit gjyqësor, paditësja nuk kishte përcaktuar qartë të dhënat e identifikimit, nuk kishte bashkëngjitur mjet identifikimi të vlefshëm dhe nuk kishte paguar tarifën gjyqësore. Po ashtu, gjykata thekson se kërkesa nuk përmbante qartësisht rrethanat faktike dhe pretendimet që kërkoheshin të provoheshin në proces.

Në vendim evidentohet gjithashtu se pala e paditur nuk ishte identifikuar saktë si person juridik dhe se aktet e bashkëngjitura ishin dorëzuar në formë fotokopjesh të panjësuara me origjinalin.

Çështja lidhet me vendimin e datës 1 maj 2026 të Komisioni i Organizimit dhe Kontrollit të Operacioneve Elektorale, i cili nuk miratoi kandidaturën e Selës për garën për kryetarin e partisë.

Mjekja Sela e kundërshtoi këtë vendim në gjykatë, duke kërkuar shpalljen e pavlefshëm të skualifikimit të saj nga gara e brendshme për drejtimin e subjektit politik Partia Demokratike e Shqipërisë, zgjedhje që pritet të zhvillohen më 23 maj.