Nxirren jashtë listës 2524 familje që përfitonin ndihmën ekonomike

Nga Zamir Alushi

Qeveria vazhdon të mbledhë dorën për të varfrit duke ulur fondet sociale. Lista e përfituesve të ndihmës ekonomike u shkurtua me 2524 familje të cilat ishin trajtuar me ndihmë në tremujorin e dytë, por nuk e përfituan gjatë periudhës korrik-shtator 2015.

Ndihma ekonomike

Gjatë tremujorit të tretë të vitit 2015, numri mesatar i familjeve të trajtuara me ndihmë ekonomike është 81.621, ndërsa gjatë tremujorit të dytë 2015, familjet e trajtuara me ndihmë ekonomike ishin 84.145. Gjithashtu, fondi i ndihmës ekonomike në tremujorin e tretë të vitit u reduktua me 4,3% krahasuar me tremujorin e mëparshëm. Sipas Buletinit Statistikor të INSTAT, fondi i ndihmës ekonomike në tremujorin e tretë ishte 343,7 milionë lekë nga 359,2 milionë lekë që ishte në periudhën prill-qershor. Ndihma ekonomike është një ndihmë në para për familjet e varfra dhe shpërndahet çdo muaj. Ajo mund të jetë e pjesshme ose e plotë, në varësi të të ardhurave të familjes. Sipas llojit të ndihmës ekonomike që marrin, rezulton se 39.073 familje u trajtuan me ndihmë ekonomike të pjesshme dhe 42.548 familje me ndihmë ekonomike të plotë. Qarku i Elbasanit ka numrin më të madh të familjeve në skemën e ndihmës ekonomike (17,7% të të gjitha familjeve në skemë në rang vendi), të cilat përfitojnë ndihmën ekonomike në masë të plotë. Familjet me katër anëtarë zënë peshën më të madhe (30,2%) në numrin e familjeve në skemën e ndihmës ekonomike, 53,7% e të cilave përfitojnë ndihmë ekonomike të plotë. Nga tabela e shpërndarjes së familjeve në ndihmë ekonomike, sipas qarkut, shihet se në Elbasan janë 14.445 familje me ndihmë të plotë ekonomike dhe asnjë me ndihmë të pjesshme. Elbasani është rrethi i vetëm që u jep të tëra familjeve në nevojë ndihmë të plotë ekonomike. Pas Elbasanit renditet Dibra me 16.2% të familjeve në nevojë, më poshtë renditen Shkodra dhe Kukësi me nga 13% të familjeve që trajtohen me ndihmë ekonomike. Numrin më të vogël të familjeve në listën e ndihmës ekonomike e ka Durrësi, që zë vetëm 1.2%, ose 990 familje dhe e parafundit është Vlora me 1.9% të familjeve që trajtohen me ndihmë ekonomike. 24.665 familje që marrin ndihmë ekonomike janë me katër anëtarë, ndërsa 18.532 familje kanë 5 pjesëtarë. Këto janë dy grupet më të mëdha të familjeve përfituese.

Pagesa e papunësisë

Numri mesatar i personave të regjistruar si punëkërkues të papunë gjatë tremujorit të tretë të vitit 2015 është 152.050. Kjo shifër është 8,3% më e lartë se sa në të njëjtin tremujor të vitit 2014. Edhe në krahasim me tremujorin e dytë 2015, ky tregues paraqitet me rritje prej 0,9%. Në tremujorin e tretë 2015, ishin pjesë e skemës së pagesës së papunësisë vetëm 3,9% e punëkërkuesve të papunë të regjistruar gjithsej. Përqindja e punëkërkuesve të papunë të regjistruar në skemën e pagesës së papunësisë është më e lartë në Prefekturën e Tiranës (7,1%) dhe më e ulët në Prefekturën e Vlorës (1,9%). Krahasuar me tremujorin e mëparshëm, në tremujorin e tretë të vitit 2015, numri i punëkërkuesve të papunë të regjistruar në skemën e pagesës së papunësisë është ulur me 351 persona. Krahasuar me tremujorin e tretë të vitit 2014, numri i punëkërkuesve të papunë në skemën e pagesës së papunësisë është ulur me 1.530 persona. Shkalla e papunësisë së regjistruar për tremujorin e tretë 2015 është 13,2%. Të papunë në pagesë papunësie janë personat e regjistruar si të papunë, të cilët trajtohen me të ardhura gjatë periudhës së parë të papunësisë mbështetur në programin e trajtimit me pagesë papunësie. E ardhura nga papunësia duhet të jetë një shumë bazë që siguron të paktën një nivel jetese minimale, çdo vit e indeksuar me vendim të Këshillit të Ministrave.

Kushti

Kriteret e pagesës së papunësisë

Personat e siguruar përfitojnë të ardhura papunësie, në rast se: a) Kanë kontribuar në sigurimin shoqëror jo më pak se 12 muaj për çdo rast përfitimi dhe janë vërtetuar nga zyra e punës se: – janë punëkërkues të papunë, të gatshëm të punësohen, kur u ofrohet një punë e paguar, e përshtatshme; pranojnë të kualifikohen ose të rikualifikohen. Ata nuk duhet të marrin përfitime të tjera, me përjashtim të pensionit të pjesshëm të invaliditetit.