NYT: Mirazhi i Islamit politik

“Ju duhet të mbani pushtetin me pëlqim, jo detyrim. Duhet të respektoni të drejtat e minoriteteve dhe të praktikoni frymën e tolerancës dhe të kompromisit. Duhet të vendosni interesat e popullit tuaj dhe funksionimin e ligjshëm të procesit politik mbi partinë tuaj. Pa këto elemente, vetëm zgjedhjet nuk e bëjnë dot demokracinë e vërtetë”. 

Gazeta New York Times kujton këtë deklaratë të presidentit të Shteteve të Bashkuara, Barack Obama, të bërë pesë vjet më parë në Kajro.

Me këtë fjalim, Obama bëri përpjekje të rehabilitonte Islamin dhe qytetërimin islamik në sytë e botës, si dhe të shpaguante Amerikën në sytë e komunitetit mysliman në botë, pas luftërave në Irak dhe Afganistan.

NYT shkruan se fjalimi në Kajro ka qenë pjesë e një plani, i cili bazohej në këshillën e një raporti të vitit 2008 të quajtur: “Ndryshimi i Drejtimit: Një drejtim i ri për marrëdhëniet e Shteteve të Bashkuara me botën myslimane”.

Ky raport është hartuar nga një grup i ish-zyrtarëve qeveritarë, edhe demokratë, edhe republikanë, si dhe nga dijetarë, analistë politikë dhe ekspertë të marrëdhënieve ndërkombëtare.

Sipas gazetës, të gjithë kanë qenë të shqetësuar për ndarjen midis Amerikës dhe botës myslimane dhe ata kanë vendosur që presidenti i ri të mbajë një fjalim madhor në një kryeqytet të rëndësishëm islamik – Kajro, Stamboll, Xhakartë ose Rabat – duke iu adresuar drejtpërdrejt botës myslimane.

Dhe këtë, presidenti Obama e bëri më 4 qershor të vitit 2009 në Universitetin e Kajros.

Gjatë dekadave, islamistët politikë e kanë tregtuar veten në Perëndim si lëvizje të moderuara që duan të pajtojnë Islamin me demokracinë. Në realitet, ata kanë qenë ithtarë të një ideologjie mesianike, – shkruan gazeta.

Ekipi i Obamës, derisa është përgatitur të përfundojë luftërat e administratës së Bushit, e ka ndjerë nevojën për miq në botën arabe, por ai ka rënë në pabesinë e Islamit “të moderuar” politik, shkruan New York Times.