Omani paralajmëron peshkatarët: Mos iu afroni kontejnerëve të anijes së mbytur në Hormuz, mund të përmbajnë lëndë të rrezikshme

Qendra e Sigurisë Detare e Omanit paralajmëroi peshkatarët dhe detarët të mos u afrohen kontejnerëve të shpërndarë në ujërat e Ngushticës së Hormuzit nga anija e mbytur GFS Pride, sepse ata mund të përmbajnë materiale të rrezikshme, siç njofton Al Jazeera.

GFS Pride, anije kontejnerësh me flamur të Singaporit, u mbyt këtë javë pasi u godit në ngushticë. Uashingtoni tha se anija u godit nga një predhë iraniane, ndërsa Teherani pretendoi se ajo kishte goditur një minë detare. Anija, që sipas raportimeve mbante më shumë se 2,500 kontejnerë, la pas në sipërfaqen e detit kontejnerë të shpërndarë, të cilët përbëjnë rrezik edhe për lundrimin e mjeteve të vogla.

Paralajmërimi omanit pason edhe apelin e mëparshëm të Gardës Revolucionare iraniane, e cila u kërkoi anijeve vendase dhe peshkatarëve të tregojnë kujdes maksimal për të mos u përplasur me kontejnerët që notojnë në ujë. Autoritetet nuk kanë specifikuar se çfarë ngarkesash të rrezikshme mund të përmbajnë kontejnerët, por u kanë kërkuar detarëve t’i raportojnë ato dhe të mbajnë distancë.

Ngushtica e Hormuzit, nga e cila para luftës kalonte rreth një e pesta e naftës botërore, mbetet një nga rrugët detare më të rrezikshme në botë: sulmet ndaj anijeve tregtare janë shtuar ditët e fundit, trafiku ka rënë ndjeshëm dhe organizatat detare paralajmërojnë se anijet rrezikojnë goditje edhe kur fikin sistemet e identifikimit.