Operacion i FBI-së greke në zinxhir picerish me 100 dyqane: 9 të arrestuar për 25 milionë euro TVSH të padeklaruar

Një operacion i gjerë i Drejtorisë për Luftën kundër Krimit të Organizuar (DAAOE), e njohur në shtypin grek si ‘FBI-ja greke’, është në zhvillim që nga orët e para të mëngjesit të së enjtes për çmontimin e një organizate kriminale, e cila dyshohet se nuk i ka paguar shtetit të paktën 25 milionë euro TVSH që nga viti 2022, siç njofton ERT.

Sipas informacioneve të deritanishme, çështja lidhet me një zinxhir të madh ushqimi me rrjet prej 100 dyqanesh picerie në të gjithë Greqinë; raportimet e ProtoThema-s, të ripublikuara nga disa media greke, e identifikojnë zinxhirin si Pizza Fan. Sipas këtyre raportimeve, rrjeti përdorte softuer të posaçëm dhe kasa fiskale të manipuluara, të cilat anashkalonin lidhjen me sistemet e administratës tatimore dhe fshihnin një pjesë të konsiderueshme të xhiros ditore.

Kontrollet po kryhen në dyqane dhe banesa nga Nëndrejtoria e Ndjekjes së Krimeve Ekonomike, në bashkëpunim me Autoritetin e Pavarur të të Ardhurave Publike (AADE) dhe Drejtorinë e Hetimimeve Kriminalistike, siç njofton ERT.

Deri tani janë arrestuar nëntë persona, që dyshohet se përbëjnë bërthamën e organizatës, ndërsa janë sekuestruar më shumë se 500 mijë euro, automjete luksoze, bizhuteri dhe një sasi e madhe provash, përfshirë disqe të fortë dhe mekanizma fiskalë që do të analizohen nga laboratorët kriminalistikë.

Të arrestuarit pritet të dalin para prokurorit kompetent; dosja, sipas raportimeve, përfshin akuzat për mashtrim ndaj shtetit, evazion fiskal të përsëritur dhe organizatë kriminale. Hetimet e autoriteteve vazhdojnë.