Operacion i madh ndërkombëtar kundër shpëlarjes së parave, Krimet Ekonomike bastisin lokacione në Prishtinë, Ferizaj dhe Fushë Kosovë

Një operacion i gjerë policor me përmasa ndërkombëtare ka nisur mëngjesin e sotëm në Kosovë, ku forca të shumta policore janë angazhuar në bastisje në disa lokacione në Prishtinë, Ferizaj dhe Fushë Kosovë. Në shënjestër të hetimeve, siç njofton Gazeta Sinjali, janë dyshimet për shpëlarje të parave dhe veprimtari kriminale me shtrirje ndërkombëtare, ndërsa aksioni po zhvillohet në koordinim me autoritetet e huaja, përfshirë ato gjermane.

Sipas burimeve të Sinjalit, operacioni po realizohet nga Drejtoria për Hetimin e Krimeve Ekonomike dhe Korrupsionit e Policisë së Kosovës, në kuadër të një hetimi të udhëhequr nga Prokuroria Speciale e Republikës së Kosovës. Bastisjet po zhvillohen me urdhër të Gjykatës Themelore në Prishtinë – Departamenti Special, ndërsa paralelisht operacione të koordinuara po zhvillohen edhe në Gjermani dhe në disa shtete të tjera evropiane.

Një nga lokacionet ku është përqendruar prania policore është objekti “Arting”, në rrugën “Bekim Fehmiu”, pranë Hotel Derand në Prishtinë, ku operojnë edhe qendra të thirrjeve, të njohura si Call Center. Gazeta Sinjali ka siguruar fotografi nga lokacioni, ku shihen pjesëtarë të Policisë dhe automjete policore të angazhuara në kuadër të aksionit të sotëm.

Ndërkohë, siç raporton Indeksonline, operacioni në disa lokacione të call center-ave në Prishtinë është zhvilluar në bashkëpunim me Europolin dhe gjatë aksionit janë arrestuar disa persona, ndërsa janë konfiskuar prova që pritet të shërbejnë në vazhdimin e hetimeve. Deri tani, megjithatë, institucionet nuk kanë dhënë ende një bilanc zyrtar përfundimtar për numrin e lokacioneve të bastisura apo të personave të arrestuar.

Sipas burimeve të Sinjalit, në kuadër të bastisjeve hetuesit po kërkojnë telefona celularë, kompjuterë, pajisje të tjera elektronike, dokumentacion financiar, para të gatshme, ar dhe sende të tjera me vlerë, të cilat mund të shërbejnë si prova për hetimet. Hetimet pritet të përqendrohen edhe në analizimin e komunikimeve, transaksioneve dhe lidhjeve të mundshme financiare ndërmjet personave dhe subjekteve të përfshira.

Ende nuk është konfirmuar nëse operacioni i sotëm lidhet drejtpërdrejt me ndonjë rrjet konkret të qendrave të thirrjeve, ndonëse mashtrimet financiare përmes ofertave të rreme të investimit kanë qenë objekt i hetimeve të autoriteteve vendore dhe ndërkombëtare edhe më parë. Operacioni vazhdon dhe detajet zyrtare për rezultatet e tij priten gjatë ditës.