Operacioni “MALI” në Gjilan: konfiskohen 53 kilogramë marihuanë, arrestohen dy të dyshuar

Policia e Kosovës ka konfiskuar 53 kilogramë substancë të dyshuar narkotike të llojit marihuanë dhe ka arrestuar dy persona në Gjilan, në kuadër të operacionit të koduar “MALI”, siç njofton Telegrafi, duke iu referuar njoftimit të Policisë.

Operacioni u realizua të premten mbrëma, më 16 tetor, rreth orës 21:40, nga hetuesit e Drejtorisë për Hetimin e Trafikimit me Narkotikë – Sektori Qendror, në koordinim me Prokurorinë Themelore në Gjilan, pas hetimeve që kishin zgjatur disa muaj. Sipas Policisë, të dyshuarit po përgatiteshin për transportimin e lëndëve narkotike jashtë vendit.

Gjatë operacionit u kontrolluan dy shtëpi dhe objektet përcjellëse të tyre, ndërsa substanca e dyshuar u gjet në bagazhin e njërës prej veturave. Vlera e saj në tregun vendor vlerësohet rreth 80 mijë euro. Si prova materiale u sekuestruan edhe dy telefona mobilë dhe dy automjete me targa vendore.

Në terren, operacioni u mbështet nga dy ekipe të Njësisë së Reagimit të Shpejtë në Gjilan dhe nga Njësia e Forenzikës Rajonale, e cila bëri fotografimin, evidentimin dhe tërheqjen e dëshmive nga vendi i ngjarjes, raporton edhe Betimi për Drejtësi.

Të arrestuarit B.A., i lindur më 1988, dhe S.H., i lindur më 1971, pas intervistimit në prani të avokatëve mbrojtës, me vendim të prokurorit të shtetit janë ndaluar për 48 orë, ndërsa hetimet për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” po vazhdojnë.