Opozita: Protesta e 9 janarit për shtet me sovranitet

Opozita kosovare deklaroi sot se “në protestën e nesërme qytetarët do të bëhen bashkë për të kërkuar sovranitetin e shtetit. Republika e Kosovës nuk mund të udhëhiqet nga njerëz që me vendimet e veta tentuan ta përmbysin rendin kushtetues të vendit”.

Në një konferencë për shtyp të mbatjur në sheshin Skenderbeu në Prishtinë, kryetarët e partive opozitare i bënë thirrje qytetarëve t’i bashkohen protestës së nesërme.

Kryetari i Aleancës për Ardhmërinë e Kosovës, Ramush Haradinaj, tha se “i ftoj të gjithë qytetarët që në ora 14:00 të vijnë tek Biblioteka Kombëtare, e të marshojmë bashkë deri në sheshin Skenderbeu. Të protestojmë për anulimin e marrëveshjeve të dëmshme dhe të kërkojmë llogaridhënie nga ata që e shkelën Kushtetutën”.

Ndërsa Kryetar i Vetëvendosjes Visar Ymeri u shpreh se nesër është një ditë jashtëzakonisht e rëndësishme për Republikën e Kosovës.

“9 janari është dita e protestës gjithëpopullore, dita e protestës së qytetarëve kundër marrëveshjeve të dëmshme dhe të rrezikshme që i ka nënshkruar Qeveria e Kosovës, dhe kundër këtyre shkelësve të Kushtetutës. Nesër, qytetarët do të bëhen bashkë për ta kërkuar sovranitetin e vendit. Republika e Kosovës nuk mund të udhëhiqet nga njerëz që me vendimet e veta tentuan ta përmbysin rendin kushtetues të vendit”, theksoi Ymeri.

Kryetari i Nismës për Kosovën, Fatmir Limaj, tha se nesër në shesh do të protestojmë masivisht, për të mos lejuar që shkelësit e Kushtetutës të vazhdojnë të qeverisin më vendin. “Është momenti kur zëri qytetar duhet të jetë i bashkuar dhe i fuqishëm, që të mos lejojë një precedent të keq në Kosovë që shkelësit e Kushtetutës të vazhdojnë të qeverisin. Nëse ata refuzojnë të japin llogari, atëherë edhe ne si qytetarë duhet të refuzojmë të na qeverisin shkelësit e Kushtetutës”, u shpreh Limaj.

Nesër në ora 14:00, do të mblidhemi tek Biblioteka Kombëtare, për të nisur kështu protestën për shtet me sovranitet dhe kundër Qeverisë antikushtetuese.