Organizohet ceremonia e ndarjes së çmimeve të konkursit Triple Helix, Shqipëri

Ministria e Zhvillimit Ekonomik, Turizmit, Tregtisë dhe Sipërmarrjes, me mbështetjen e Agjencisë Shqiptare të Zhvillimit të Investimeve, organizoi të martën ceremoninë përfundimtare të ndarjes së çmimeve të konkursit Triple Helix, Shqipëri, përmes së cilit u prezantuan projektet më të mira inovative.

Ceremonia u zhvillua në ambientet e Institutit Harry Fultz, Tiranë, ku të pranishëm ishin përfaqësues nga Komisioni Europian, OECD, MZHETTS, AIDA, akademikë, biznesi, etj. Konkursi ishte një risi e madhe për eko-sistemin shqiptar ku morën pjesë më shumë se 25 përfaqësues të institucioneve private, publike dhe akademike për të zhvilluar ide dhe modele të partneritetit.

Juria e përzgjedhur nga OECD me eksperiencë ndërkombëtare në fushën e inovacionit kishte përzgjedhur 6 projekt-aplikime si më të mira nga të cilat 3 u shpallën në ceremoninë e sotme. Fituesit do të mbështeten për të transformuar idetë e tyre në realitet duke përfituar ekspertizë teknike nga ekipi i OECD duke zhvilluar projekt-idetë me ekspertë të njohur në fushën e inovacionit. Si finalistë, ata do të përfitojnë edhe promovim të lartë kombëtar dhe ndërkombëtar dhe do të kenë mbështetje të mëtejshme.

Përmes këtij projekti OECD mbështeti qeverinë shqiptare në krijimin e një mjedisi të favorshëm për bashkëpunimin biznes-akademi-qeveri për të zhvilluar inovacionin, dhe ndihmoi kompanitë shqiptare të kuptojnë dhe të korrin përfitimet e njohurive komercialiste dhe akademike për të shfrytëzuar plotësisht potencialin e tyre kërkimor.