Pa gjumë natën, hileja si ta përballoni ditën më mirë
Një dremitje e shkurtër për të përballuar ditën që pason një natë pa gjumë. Sipas një studimi francez të publikuar në revistën shkencore “Journal of Clinical Endocrinology & Metabolism”, thuhet se mjaftojnë 30 minuta dremitje gjatë ditës, për të rifituar energjitë, pas një nate vetëm me dy orë gjumë.
Organizata Botërore e Shëndetësisë në shifrat e publikuara së fundmi bën me dije se janë tre ndër dhjetë persona në moshë adulte, ata që flenë më pak se gjashtë orë natën.
Lodhja nga pagjumësia mund të shkaktojë mungesë rendimenti në punë, aksidente rrugore por edhe sëmundje si obeziteti, stresi, presioni i lartë dhe depresioni.
“Të dhënat tona sugjerojnë se 30 minuta gjumë në ditë mundësojnë një normalizim të sistemit nervor por edhe të organizmit”, garanton Brice Faraut, studiues i Université Paris Descartes-Sorbonne Paris Cité.
Studimi tregoi efektin e dremitjes pas një nate pa gjumë, pasi u monitoruan 11 persona me moshë nga 25 deri në 32 vjeç.
Rezultoi se personat që kishin dremitur gjysmë ore, kishin një rekuperim 2.5 herë të nivelit të hormonit të noradrenalinës, ndërsa tek të tjerët, nuk u shënuan ndryshime.
