Pacolli: Me AKR-në do ta marrë drejtimin e Qeverisë

Kryetari i Aleanca Kosova e Re (AKR), Behgjet Pacolli, në emisionin “Info -Box” të RTV Dukagjinit, ka theksuar se zgjedhjet e parakohshme duhet të mbahen në shkurt të vitit të ardhshëm.

Sipas tij, nuk ka zgjedhje nëse nuk bëhet ligji i ri zgjedhor, duke shtuar se edhe opozita ka ndikuar, për një vit e gjysmë, që të kemi kësi probleme në skenën politike.

Ai ka theksuar se nuk i mjaftojnë 4 ose 5 për qind të votave për ta sjellë ndryshimin në Kosovë, dhe se sipas tij, ai beson se qytetarët, në zgjedhjet e ardhshme, do t’ia mundësojnë partisë së tij që ta marrë drejtimin e Qeverisë.

“Deri atëherë duhet të përgatitemi në mënyrë dinjitoze. Kosova nuk ka kohë për bojkote dhe për ngecje. AKR është duke u rikonsoliduar, me njerëz të ri dhe të cilët kanë vullnetit për të kontribuar. Ne jemi duke punuar vazhdimisht. AKR-ja ka njerëz të devotshëm, ka njerëz që e kanë kuptuar situatën mirë. Nëse e kam timonin me udhëheq Qeverinë e Kosovës, unë synoj ta kem atë forcë me të cilën i definoj gjërat në Kosovë”, ka theksuar Pacolli.

Ai ka thënë se kur ka qenë në politikë, ka sjellë njohje shumë shpesh për Kosovën, duke shtuar se AKR-ja është parti e hapur dhe “mjafton me qenë njeri i sinqertë, profesionist për tu angazhuar me këtë parti”.

“Target i joni është që në mandatin e parë të qeverisjes, Kosovës me ia kthy kahjen e duhur, për ta bërë kështu një vend i cili do të jetë i pavarur prej të hyrave doganore”, ka shtuar ai.

Pacolli më tutje ka theksuar se rezultatet e Qeverisë së Kosovës janë pesimiste, duke shtuar se është për tu shqetësuar se si puna e këtij ekzekutivi është duke shkuar huq.

Ai ka thënë se kjo garniturë qeverisëse nuk po shënon suksese në qeverisje sepse “nuk kanë ndjenja dhe se këtyre njerëzve iu mungon dashuria për vend – për Kosovën, duke shtuar se “këta synim e kanë vetëm postin dhe privilegjet e tyre”.