Pajoviç i drejtohet Kuvendit: Anëtarësimi i Malit të Zi në NATO, një hap historik

Kryeparlamentari malazez, Darko Pajoviç, në fjalën drejtuar të enjten Kuvendit të Shqipërisë, e konsideroi “një hap historik”, anëtarësimin e Malit të Zi në NATO. I pranishëm në seancën e sotme, ku u miratua me unanimitet ratifikimi i protokollit të anëtarësimit, Pajoviç falenderoi deputetët shqiptarë për votën ‘pro’ këtij dokumenti, ndërsa u shpreh se ky është “një hap historik, kulturor, logjik dhe civilizues i Malit të Zi”
“Anëtarësimi në NATO në të ardhmen siguron që vendi ynë është në drejtimin e duhur, pasi kemi filluar me reformat gjithëpërfshirëse, sidomos ato në fushën e sundimit të ligjit, që janë vlera të përbashkëta, dy anë të së njëjtës fytyrë të Evropës Perëndimore”, u shpreh Pajoviç.
Ai vuri në dukje dhe përparimin në procesin e negociatave me BE-në në kuadër të anëtarësimit. “Mali i Zi si mik dhe fqinj i mirë është i gatshëm të ndajë përvojat e tij nga procesi i negociatave”, tha Pajoviç.
Ai vuri në dukje rolin e veçantë të minoriteteve në marrëdhëniet mes dy vendeve. “Shqiptarët në Mal të Zi, tha kryeparlamentari malazez, kanë qenë shtetas luajalë të Malit të Zi dhe këtë e kanë dëshmuar në vitin 2006 kur kanë dhënë një kontribut të veçantë në pavarësinë e vendit tonë dhe këtë e tregojnë edhe në ditët e sotme”, nënvizoi ai.