Panairi Artizanal – Në Tiranë, 40 biznese ekspozojnë 200 punime dore

Në kryeqytet, pranë Piramidës është çelur Panairi i Artizanatit shqiptar. 40 biznese nga treva të ndryshme të vendit, por edhe më gjerë nga Kosova e Mali i Zi, prezantojnë qindra punime artizanale të bëra me dorë nga gratë dhe vajzat e këtyre zonave.

Panairi është parë si mundësi për të rikthyer traditën shqiptare dhe për të nxitur interesin ndaj këtyre produkteve.

Ekspozitës së artizanatit, nuk i mungojnë as punimet zbukuruese të drurit. Megjithëse vend kryesorë zënë sixhadet, mbulesat etj, me fije leshi dhe pambuku. Punimet e tyre janë të ndryshme, të bukura dhe të kërkuara për qytetarët, por femrat artizane bashkohen në të njëjtën problematikë, mungesën e tregut për t’i shitur ato.
Panairi Kombëtar i Artizanatit i organizuar nga Agjencia e Biznesit Social dhe Ministria e Mirëqenies Sociale do të jetë i hapur edhe gjatë ditës së mërkurë. Ky sektor punëson qindra gra dhe vajza në zona të ndryshme të vendit, por në të janë të punësuar edhe shumë meshkuj.