Papa Leo i telefonon Zelenskyt: Ukraina dhe Rusia të bashkëpunojnë për ndihmat në Oleshky

Papa Leo zhvilloi të hënën një bisedë telefonike me presidentin e Ukrainës, Volodymyr Zelensky, dhe i kërkoi Ukrainës dhe Rusisë të bashkëpunojnë për të lejuar hyrjen e ndihmave dhe ushqimit në qytetin e bllokuar Oleshky, siç njofton Reuters, duke cituar Vatikanin.

“Papa shprehu shpresën se bashkëpunimi mes të dyja palëve do të lejojë dërgimin e ushqimit dhe ndihmës mjekësore, si dhe evakuimin vullnetar dhe të sigurt të popullsisë civile”, thuhet në deklaratën e Vatikanit për bisedën e së hënës. Zelensky nuk publikoi menjëherë një deklaratë për bisedën.

Banorët e Oleshky-t, qytet i pushtuar nga forcat ruse që nga shkurti i vitit 2022, kanë raportuar një krizë ushqimore në thellim.

Papa, i cili po rikuperohet pas një operacioni për kancer në mushkëri, foli të premten me presidentin rus Vladimir Putin dhe i kërkoi të organizojë një armëpushim për të lehtësuar hyrjen e ndihmave në Oleshky. Kremlini tha më pas se Putini kishte pranuar të bashkëpunonte me Papën për organizimin e furnizimeve për qytetin, por nuk përmendi armëpushimin.

Leo, i cili u bë Papë në maj të vitit 2025, është takuar disa herë me Zelenskyn; takimi i tyre i fundit ishte në dhjetor, në rezidencën e Papës në Castel Gandolfo në Itali, pas të cilit Leo u kërkoi udhëheqësve evropianë një qasje kolektive në negociatat për paqe mes Rusisë dhe Ukrainës.