Partia Demokratike në pushtet fiton zgjedhjet lokale në Korenë e Jugut

Partia Demokratike në pushtet në Korenë e Jugut ka shënuar një fitore të thellë në zgjedhjet lokale dhe zgjedhjet e pjesshme parlamentare, duke forcuar më tej pozitat e saj politike pas suksesit të arritur në zgjedhjet legjislative të vitit 2024.

Sipas mediave koreane partia e presidentit Lee Jae Myung fitoi 12 nga 16 postet kryesore të kryetarëve të bashkive dhe guvernatorëve që ishin në garë, përfshirë edhe qytetin e Busanit. Ndërkohë, Partia e Pushtetit Popullor, forca kryesore opozitare, siguroi katër poste, mes tyre edhe kryeqytetin Seul.

Në zgjedhjet e pjesshme parlamentare, Partia Demokratike fitoi nëntë nga 14 vendet e kontestuara, ndërsa opozita mori katër mandate. Një vend iu takua një kandidati të pavarur.

Nga 14 vendet parlamentare në garë, 13 prej tyre mbaheshin më parë nga Partia Demokratike, e cila tashmë gëzon shumicën në Asamblenë Kombëtare me 300 anëtarë.

Analistët vlerësojnë se rezultati do t’i japë qeverisë së presidentit Lee një mandat më të fortë për të avancuar me programin e saj të reformave.

Përveç posteve politike kryesore, qytetarët votuan edhe për 16 mbikëqyrës të arsimit, 227 drejtues të qeverisjes vendore dhe rreth 4 mijë anëtarë të këshillave lokalë.

Zgjedhjet u zhvilluan një vit pas marrjes së detyrës nga administrata e presidentit Lee më 4 qershor. Pjesëmarrja e votuesve arriti nivelin më të lartë që nga zgjedhjet e para lokale mbarëkombëtare të mbajtura në vitin 1995.

Sipas legjislacionit të Koresë së Jugut, zgjedhjet lokale zhvillohen çdo katër vjet dhe organizohen në mes të ciklit të zgjedhjeve parlamentare për të shmangur mbivendosjen e proceseve kryesore zgjedhore.