PCOS nuk ishte ajo që mendonim, gjendja e njohur hormonale merr emër të ri

Një gjendje hormonale që prek rreth 1 në 8 gra në mbarë botën ka marrë një emër të ri, me shpresën për të përmirësuar diagnostikimin dhe trajtimin.

Sipas studiuesve dhe mjekëve, ajo që më parë njihej si sindroma e vezoreve policistike (PCOS) tani quhet sindroma metabolike poliendokrine ovariane (PMOS).

Ekspertët thonë se emri i vjetër ishte i pasaktë dhe shpesh çorientues, sepse krijonte idenë se problemi lidhej vetëm me “cistet në vezore”, ndërsa në realitet bëhet fjalë për një çrregullim kompleks hormonal dhe metabolik. Sipas tyre, kjo ka kontribuar në diagnoza të vonuara dhe trajtim jo të plotë.

Gjendja lidhet me çrregullime hormonale që mund të ndikojnë në peshë, metabolizëm, shëndetin mendor, sistemin riprodhues dhe lëkurën. Ajo shpesh shoqërohet edhe me rezistencë ndaj insulinës dhe rrit rrezikun për diabet të tipit 2, sëmundje të zemrës dhe goditje në tru.

Simptomat ndryshojnë nga personi në person, gjë që e bën diagnostikimin më të vështirë.

Më të zakonshmet janë cikle menstruale të parregullta, nivele të larta të hormoneve androgjene që mund të shkaktojnë akne, rritje të tepërt të qimeve ose rrallim të flokëve. Mund të shfaqen edhe ndryshime në funksionin e vezoreve, por jo domosdoshmërisht kiste.

Gjendja lidhet gjithashtu me vështirësi në fertilitet, pasi ovulimi mund të ndodhë më rrallë. Megjithatë, shumica e grave me këtë gjendje mund të mbeten shtatzënë dhe të kenë shtatzëni të suksesshme.

Trajtimi varet nga simptomat dhe nevojat individuale, por shpesh përfshin ndryshime në stilin e jetesës si ushqyerje më e shëndetshme, aktivitet fizik dhe gjumë i rregullt. Gjithashtu mund të përdoren barna që ndihmojnë në rregullimin e insulinës, ilaçe që ulin efektin e androgjeneve ose kontraceptivë hormonalë.

Mjekët dhe studiuesit shpresojnë se emri i ri do të ndihmojë në kuptimin më të mirë të gjendjes dhe në përmirësimin e kujdesit për pacientet.

/tvklan.al