PD dorëzon “amendamentin e dekusarizimit” në Kuvend

Lulzim Basha ka deklaruar këtë të enjte se, Partia Demokratike depoziton sot në Parlament atë që e quan “amendamentin e dekusarizimit”.
“Ndalimin e rikandidimit ose emërimit në funksione publike të atyre që humbasin mandatin e deputetit, sepse shkelin Kushtetutën duke zhvatur paratë dhe pasuritë publike të shqiptarëve”, ka njoftuar Basha.
Sipas një njoftimi për shtyp, “kjo nismë është ndërmarrë nga një e pesta e deputetëve të Kuvendit të Shqipërisë, anëtarë të grupit parlamentar të Partisë Demokratike”.
“Me bindjen se dekusarizimi i Kuvendit dhe jetës publike në vend është masë plotësuese e reformës së dekriminalizimit dhe hap jetik për mbrojtjen e interesit publik”, thuhet në letrën që kreu i grupit parlamentar Edi Paloka i ka drejtuar kryetarit të Kuvendit, Ilir Meta.
Ndonëse nuk i referohet në mënyrë direkte, amendamenti i partisë më të madhe të opozitës përputhet me rastin e ish-deputetit Koço Kokëdhima, të cilit pak ditë më parë Gjykata Kushtetuese i hoqi mandatin për shkak se kishte përfituar fonde publike.