Ulen çmimet e prodhimeve bujqësore
Në tregjet e vendit çmimet e prodhimeve bujqësore shënuan rënie këtë javë, kundrejt javës së fundit të muajit korrik, ndonëse mbetën më të shtrenjta se një vit më parë.
Në pikun e sezonit, sipas të dhënave zyrtare, çmimet e zarzavateve rezultojnë 25.1% më të larta krahasuar me një vit më parë. Ndërsa me rënie të çmimit tregtohen 40% e prodhimeve bujqësore të stinës dhe disa produkte blegtorare.
Ekspertët e bujqësisë shprehen se, rritja e eksporteve dhe sezoni veror i pastabilizuar gjatë muajve (maj, qershor e korrik) solli vonesa në daljen në treg të prodhimit bujqësor, si pasojë dhe rritje të çmimeve. Pra, prodhimi bujqësor ndyshe nga sezonet e kaluara me vështirësi po arrin të neutralizojë efektin e importeve duke ruajtur dhe inflacion të lartë për këto prodhime. Sipas të dhënave zyrtare, çmimet më të lira për perimet shënohen në rrethet Lushnje e Fier ndërsa më të lartat janë në Tiranë, Durrës dhe Vlorë.
