Përfaqësuesi i Khamenei-t te IRGC: Mojtaba Khamenei është mirë dhe po e drejton vendin, Irani gati për “goditje të paprecedentë”

Abdollah Haji Sadeghi, përfaqësuesi i Liderit Suprem të Iranit te Garda Revolucionare Islamike (IRGC), ka deklaruar se Mojtaba Khamenei po i ushtron detyrat e tij të lidershipit dhe është në gjendje të mirë shëndetësore, siç njofton Al Jazeera.

Sipas Haji Sadeghi-t, Khamenei nuk është shfaqur publikisht për shkak të luftës, por kjo nuk e ka penguar atë të drejtojë vendin. Deklarata vjen mes spekulimeve të vazhdueshme për gjendjen e liderit iranian, i cili mori detyrën pas vdekjes së babait të tij, Ali Khamenei, në sulmet amerikano-izraelite të 28 shkurtit dhe që atëherë nuk ka bërë asnjë paraqitje publike.

Përfaqësuesi i Liderit Suprem te Garda paralajmëroi gjithashtu se Irani do t’i japë armikut një “goditje të paprecedentë” nëse ai kryen ndonjë agresion të ri kundër vendit.

Paralajmërimi vjen në një kohë tensionesh të larta mes Teheranit dhe Uashingtonit: një ditë më parë, Garda Revolucionare pretendoi se kishte goditur shtatë anije në Gjirin Persik dhe pranë Ngushticës së Hormuzit, ndërsa presidenti amerikan Donald Trump i akuzoi autoritetet iraniane se po shpikin sulme për të rritur çmimin e naftës para zgjedhjeve të mesmandatit në SHBA.