Përfundon linja e interkonjeksionit Shqipëri-Kosovë. Rama: Ngjarje e shënuar

Përfundon projekti “Linja e interkonjeksionit 400 kV Shqipëri-Kosovë”. Projekti është financuar nga banka Gjermane KFW. Për pjesën e Shqipërisë ka patur vlerën 29 milionë euro dhe është implementuar nga kompania kontraktore Energoinvest.

“Është një ngjarje e shënuar në rrugën e integrimit të hapësirës sonë përmes një integrimi të gjithanshëm, duke filluar nga energjia e duke vazhduar në të gjithë sektorët. Kemi bërë shumë së bashku për të përafruar në çdo sektor qasjen tonë ligjore dhe administrative”, deklaroi kryeministri Edi Rama.

Kreu i qeverisë shtoi se “po krijojmë premisën themelore për një treg të përbashkët të energjisë”.

Ndërsa kryeministri kosovar Isa Mustafa u shpreh: “Ky projekt ka shumë rëndësi, është ekuivalent me “Rrugën e Kombit”. Përmbush zotimet tona për të krijuar një sistem të qëndrueshëm energjetik”.

Ndërsa ministri i Energjitikës, Damian Gjiknuri, deklaroi se “vitin e ardhshëm do të fillojë linja e interkonjeksionit me Maqedoninë”.

“Sektori energjetik po jep shenja që po kalon nga ringjallja në konsolidim”, tha Gjiknuri.

Linja e interkonjeksionit 400 kV Shqipëri – Kosovë ka një gjatësi totale 241.1 km, nga të cilat 151.1 km shtrihen në territorin e Shqipërisë dhe 90 km shtrihen në territorin e Kosovës. Segmenti i parë i parë i linjës nga Tirana në Vaun e Dejës me gjatësi 80 km përfshin shtrirjen e qarkut të dytë në linjën ekzistuese Tiranë-Podgoricë dhe Segmenti i dytë i linjës konsiston në ndërtimin e një linjeje të re me një qark Vau i Dejës-Morinë me gjatësi 71 km.

Linja e Interkonjeksionit 400 kV Shqipëri-Kosovë ka dy përcjellës për fazë të tipit ACSR 490/65 mm 2. Përcjellësi i mbrojtjes nga goditjet atmosferike do të jetë i pajisur në brendësi me fibra optike, për qëllime të telekomunikacionit dhe shkëmbimit të të dhënave.