Përleshje e përgjakshme në Shkup: dy shtetas turq arrestohen për tentim vrasje në Karposh

Dy shtetas turq, të moshës 36 dhe 22 vjeç, janë arrestuar në Shkup nën dyshimin për tentim vrasje, pasi së bashku me një person të tretë kanë sulmuar dy persona me mjet të mprehtë, njofton policia, siç raporton Rruga.

Sipas policisë, ngjarja ka ndodhur në një banesë në lagjen Karposh të Shkupit, ku dy viktimat, të dy 26-vjeçarë dhe shtetas turq, kanë marrë lëndime nga sulmi. Në banesë ndodheshin edhe dy gra.

Pas incidentit, të dyshuarit janë larguar nga vendi i ngjarjes, por policia ka arritur t’i lokalizojë dhe arrestojë dy prej tyre në rrugën “Magjistralja e Adriatikut” në Shkup, raporton më tej Rruga duke iu referuar njoftimit të policisë.

Ndaj dy të arrestuarve është ngritur kallëzim penal me procedurë të shpejtë, ndërsa policia po punon për identifikimin dhe arrestimin e personit të tretë të përfshirë në rast.