Përleshje në burgun e Domokut në Greqi: gjashtë të plagosur, njëri në gjendje të rëndë

Gjashtë të burgosur kanë mbetur të plagosur, njëri prej tyre në gjendje të rëndë, pas një përleshjeje mes të burgosurve shqiptarë dhe algjerianë në burgun e Domokut, në prefekturën e Fthiotidës në Greqinë qendrore, siç njofton portali shqiptar lajmmsot.com duke cituar mediat lokale greke.

Sipas raportimeve, sherri shpërtheu dje pasdite për arsye ende të panjohura. Gjashtë të plagosurit, të moshave 26 deri në 41 vjeç, u dërguan fillimisht në Qendrën Shëndetësore të Domokut, ndërsa katër prej tyre u transferuan më pas në Spitalin e Lamias.

Njëri nga të burgosurit, i cili kishte pësuar plagë të rënda në kokë, iu nënshtrua një ndërhyrjeje të menjëhershme kirurgjikale dhe gjendja e tij shëndetësore mbetet e rëndë, sipas portalit. Një tjetër i burgosur, i plagosur me thikë artizanale, e ka kaluar rrezikun për jetën pas ndërhyrjes mjekësore.

Ngjarja e djeshme është incidenti i tretë i ngjashëm që regjistrohet në të njëjtin burg brenda rreth një muaji e gjysmë, çka ngre alarmin e autoriteteve të burgjeve në Greqi. Në përleshjen e regjistruar rreth 15 ditë më parë në Domok, pesë persona mbetën të plagosur, siç raportoi lamiareport.gr.