Përvoja kroate e rëndësishme për Kosovën në zbatimin e MSA-së

Zëvendësministri i Integrimit Evropian, Ramadan Ilazi, u takua sot me Ambasadoren e Kroacisë, Marija Kapitanoviç dhe sekretarin e parë Mladen Glavina, të cilët ranë dakord për një sërë takimesh me fokus të veçantë konkretizimin e bashkëpunimit në zbatimin e MSA-së.

Zëvendësministri Ilazi ka falënderuar ambasadoren Kapitanoviç për bashkëpunimin dhe mbështetjen e vazhdueshme që ka ofruar Republika e Kroacisë për Kosovën, në veçanti në procesin e integrimit evropian.

Sipas një komunikate të Ministrisë së Integrimeve, gjatë takimit zëvendësministri Ilazi diskutoi për çështje të Marrëveshjes së Stabilizim-Asocimit, përgatitjet që po bëjnë institucionet e Kosovës në implementimin e MSA-së, duke theksuar që Kosova ka nevojë për përvojën dhe ekspertizën kroate në zbatimin e MSA-së.

Në anën tjetër, ambasadorja Kapitanoviç ka shprehur gatishmërinë e qeverisë së Kroacisë për bashkëpunim të mëtejshëm.

Zëvendësministri Ilazi dhe ambasadorja Kapitanoviç u dakorduan për një sërë takimesh me fokus të veçantë konkretizimin e bashkëpunimit në zbatimin e MSA-së.