Policia arreston 10 serbo-boshnjakë të dyshuar për krime lufte

Policia boshnjake arrestoi sot 10 ish-përgjegjës të lartë të policisë dhe ushtrisë serbe në Bosnje, të dyshuar për krime lufte, kryesisht ekzekutimin e dhjetëra civilëve, në fillim të luftës ndërkomunitare të viteve 1992-95.

”Operacioni policor u zhvillua në rajonet e Zvornikut, Bijeljinas dhe Ugljevikut, në verilindje të vendit”, njoftoi prokuroria boshnjake në një komunikatë.

Të 10 personat e arrestuar dyshohen se kanë planifikuar, drejtuar dhe marrë pjesë në një operacion të strukturave ushtarake dhe policore që synonin largimin e banorëve myslimanë nga qyteti i Lokanjit, në rajonin e Zvornikut.

Rreth 120 civilë, mes të cilëve gra dhe fëmijë, u larguan më 14 korrik 1992 nga banesat e tyre dhe 67 të tjerë u pushkatuan, sipas të njëjtave burime.

Rajoni i Zvornikut ka qenë skenë e një fushate të përgjakshme të spastrimit etnik të zhvilluar nga forcat serbo-boshnjake në fillim të konfliktit.

Rreth dy mijë myslimanë u vranë në këtë rajon, sipas shoqatave të organizauara nga familjet e viktimave. Me qindra persona vazhdojnë ende të jenë të zhdukur.

Lufta e Bosnjes ka bërë rreth 100 mijë të vdekur dhe rreth dy milionë refugjatë dhe të shpërngulur në një vend që numëron sot 3,8 milionë banorë.